Հաագայում բացվել է Ռուսաստանի կողմից Ուկրաինա ներխուժման հետաքննության միջազգային կենտրոնը։.
Հաագայում բացվել է Ագրեսիայի հանցագործությունների հետապնդման միջազգային կենտրոնը։ Այն ներառում է ներկայացուցիչներ Ուկրաինայից, ԵՄ-ից, ԱՄՆ-ից և Միջազգային քրեական դատարանից։ Կենտրոնը կհետաքննի Ռուսաստանի կողմից Ուկրաինա ներխուժումը և այն հանցագործությունները, որոնք դուրս են այլ միջազգային իրավական մարմինների իրավասության շրջանակներից։ Աշխատանքները կհամակարգի ԵՄ արդարադատության Eurojust գործակալությունը։.
Դիդիե Ռեյնդերս, արդարադատության հարցերով եվրահանձնակատար. «Անդամ պետությունները վճռորոշ դեր կխաղան ապացույցների հավաքագրման, վկաների և հնարավոր կասկածյալների նույնականացման, ձերբակալման օրդերների կատարման գործում, այդ թվում՝ Միջազգային քրեական դատարանի կողմից տրվածների, և ապահովելու, որ այս սարսափելի հանցագործությունները կատարածները չկարողանան խուսափել արդարադատությունից»։.
Կենտրոնի աշխատանքը քայլ է դեպի հատուկ դատարանի ստեղծումը, որը կարող է պատասխանատվության ենթարկել Ռուսաստանի ղեկավարությանը Ուկրաինայի դեմ պատերազմ սանձազերծելու համար։.
Անդրեյ Կոստին, Ուկրաինայի գլխավոր դատախազ. «Ռուսաստանի ագրեսիան Ուկրաինայի նկատմամբ և ուժի շարունակական կիրառումը նրա ինքնիշխանության, տարածքային ամբողջականության և քաղաքական անկախության դեմ սպառնում է Ուկրաինայի գոյությանը և ուղղված է ոչ միայն իմ երկրի դեմ, այլև ներկայացնում է համաշխարհային սպառնալիք խաղաղության, անվտանգության և կայունության համար»։.
Այս գարնանը Միջազգային քրեական դատարանը ձերբակալման օրդերներ տվեց Ռուսաստանի նախագահ Վլադիմիր Պուտինի և երեխաների իրավունքների հանձնակատար Մարիա Լվովա-Բելովայի նկատմամբ: Նրանց դեմ մեղադրանքները վերաբերում են ուկրաինացի երեխաների արտաքսմանը:.
