Եթե Գերմանիան չկարողանա Ուկրաինային Leopard 2 տանկեր մատակարարել, Լեհաստանը ինքը կհոգա դրա մասին, հայտարարել է վարչապետ Տադեուշ Մորավեցկին։ Այդ նպատակով Վարշավան կստեղծի «փոքր կոալիցիա», որը Կիևին կապահովի տանկերով, բացատրել է նա։.
Եթե Գերմանիայի կառավարությունը չկարողանա Ուկրաինային մատակարարել Leopard 2 մարտական տանկեր, Լեհաստանը կկազմի երկրների «փոքր կոալիցիա», որը Կիևին կապահովի «ժամանակակից սարքավորումներով» և «ժամանակակից տանկերով»՝ սեփական զինանոցներից, հայտարարել է Լեհաստանի վարչապետ Տադեուշ Մորավեցկին PAP լրատվական գործակալությանը կիրակի՝ հունվարի 22-ին տված հարցազրույցում։ Նա կտրուկ քննադատել է Գերմանիայի կանցլեր Օլաֆ Շոլցի՝ Ուկրաինային Leopard տանկեր մատակարարելու վերաբերյալ տատանողական դիրքորոշումը։ «Գերմանիայի դիրքորոշումն այս հարցում անընդունելի է», - ընդգծել է Մորավեցկին։.
«Ռուսաստանի ագրեսիվ պատերազմի պատճառով ամեն օր մահանում են անմեղ մարդիկ։ Ռուսական ռումբերը ավերածություններ են գործում ուկրաինական քաղաքներում։ Հարձակվում են քաղաքացիական թիրախներ, մահանում են կանայք և երեխաներ», - ասել է Լեհաստանի վարչապետը։.
Դեռևս մինչև Ռամշտայնում Ուկրաինայի հարցով կոնտակտային խմբի վերջին հանդիպումը, Լեհաստանը պատրաստակամություն էր հայտնել իր սեփական պահեստներից Ուկրաինա տեղափոխել «Լեոպարդ» տանկերը, սակայն դրա համար նախ անհրաժեշտ է այս ռազմական տեխնիկայի արտադրող Գերմանիայի համաձայնությունը։ Մինչ օրս Գերմանիան միակ բանը, որին համաձայնել է, իր «Լեոպարդ» տանկերի գույքագրումն է՝ որոշելու համար, թե քանիսը կարող են փոխանցվել Ուկրաինա։.
