Ուկրաինայի ժողովուրդը ճանաչվել է Անդրեյ Սախարովի անվան մտքի ազատության մրցանակի 2022 թվականի դափնեկիր։ Որոշումը կայացվել է չորեքշաբթի՝ հոկտեմբերի 19-ին, Ստրասբուրգում, Եվրախորհրդարանի նախագահության կողմից, որի կազմում են նախագահ Ռոբերտա Մեցոլան և բոլոր խորհրդարանական խմբերի ղեկավարները։.
Եվրոպական խորհրդարանը նշեց ուկրաինացի ժողովրդի «կյանքերի անհավանական կորուստը և ավերված քաղաքներն ու գյուղերը» և նրանց պայքարը՝ պաշտպանելու իրենց հայրենիքը, ինքնիշխանությունը, անկախությունը և տարածքային ամբողջականությունը, ինչպես նաև ազատությունը, ժողովրդավարությունը, օրենքի գերակայությունը և եվրոպական արժեքները: Եվրախորհրդարանի պատգամավորները նաև գովաբանեցին Ուկրաինայի նախագահ Վլադիմիր Զելենսկու քաջությունը, դիմացկունությունը և նվիրվածությունը իր ժողովրդին, ինչպես նաև անհատների, քաղաքացիական հասարակության ներկայացուցիչների, պետական և հասարակական հաստատությունների դերը:.
«Այս մրցանակը նախատեսված է այն ուկրաինացիների համար, ովքեր պայքարում են։ Նրանց համար, ովքեր ստիպված են եղել փախչել։ Նրանց համար, ովքեր կորցրել են սիրելիներին։ Բոլոր նրանց համար, ովքեր ոտքի են կանգնում և պայքարում են այն բանի համար, ինչին հավատում են։ Ես գիտեմ, որ Ուկրաինայի քաջարի ժողովուրդը չի հանձնվի, և մենք էլ չենք հանձնվի», - ասաց Ռոբերտա Մեցոլան։ «Ռուսաստանի կողմից Ուկրաինայի դեմ իրականացվող չհրահրված ագրեսիվ պատերազմը մեծ ծանրություն է պատճառում ուկրաինացի ժողովրդին։ Նրանք (ուկրաինացիները - խմբ.) ոչ միայն պայքարում են իրենց տները, ինքնիշխանությունը, անկախությունը և տարածքային ամբողջականությունը պաշտպանելու համար, այլև պաշտպանում են ազատությունը, ժողովրդավարությունը, օրենքի գերակայությունը և եվրոպական արժեքները մարտադաշտում՝ դաժան ռեժիմի դեմ, որը ձգտում է խաթարել մեր ժողովրդավարությունը, թուլացնել և բաժանել մեր Միությունը», - հավելեց Եվրոպական խորհրդարանի նախագահը։.
Մրցանակաբաշխության արարողությունը տեղի կունենա դեկտեմբերին։
Մրցանակաբաշխության արարողությունը տեղի կունենա դեկտեմբերի 14-ին Ստրասբուրգում: Հոկտեմբերի 13-ին հայտարարված երեք եզրափակիչի մասնակիցների թվում են Ուկրաինայի ժողովուրդը, Wikileaks-ի հիմնադիր Ջուլիան Ասանժը և Կոլումբիայի ճշմարտության հանձնաժողովը:.
Մտքի ազատության մրցանակը, որը կրում է խորհրդային ֆիզիկոս և մարդու իրավունքների պաշտպան Անդրեյ Սախարովի անունը, հիմնադրվել է Եվրոպական խորհրդարանի կողմից 1988 թվականին և շնորհվում է անհատներին կամ ոչ կառավարական կազմակերպություններին, որոնք աչքի են ընկել մարդու իրավունքների և հիմնարար ազատությունների պաշտպանության գործում: Մրցանակը կազմում է 50,000 եվրո: 2021 թվականին մրցանակը շնորհվել է բանտարկված ռուս ընդդիմադիր գործիչ Ալեքսեյ Նավալնիին, մեկ տարի առաջ՝ բելառուսական ընդդիմությանը, իսկ 2018 թվականին՝ ուկրաինացի ռեժիսոր Օլեգ Սենցովին, որն այդ ժամանակ բանտարկված էր Ռուսաստանում:.
