Եվրամիությունը նոր պատժամիջոցներ է պատրաստում Ռուսաստանում գործող անհատների և կազմակերպությունների դեմ, հաղորդում է EUobserver-ը՝ հղում անելով հրատարակության կողմից ձեռք բերված պատժամիջոցների ցանկին։.
Թիրախների թվում են ռուս դերասաններ Սերգեյ Բեզրուկովը և Վլադիմիր Մաշկովը, «Գիշերային գայլեր» բայքերական ակումբը և դրա ներկայացուցիչները, Մոսկվայի քաղաքապետ Սերգեյ Սոբյանինը և «Ռոստեխ»-ի գլխավոր տնօրեն Սերգեյ Չեմեզովը։.
ԵՄ-ն նշել է, որ Մաշկովն ու Բեզրուկովը պաշտպանում են Ուկրաինայում պատերազմը: «Գիշերային գայլերի» առաջնորդ Ալեքսանդր Զալդոստանովն իր հերթին «ակտիվորեն աջակցում է ռուսական պետական քարոզչությանը և հրապարակայնորեն մերժում է Ուկրաինայի պետականության իրավունքը»:.
Ընդհանուր առմամբ, նոր պատժամիջոցներին կենթարկվեն ինը իրավաբանական անձինք և 47 անհատներ։ Նրանց մեծ մասը զինվորական հրամանատարներ և քաղաքական գործիչներ են, որոնք համագործակցել են Ուկրաինայի օկուպացված տարածքներում ռուսամետ վարչակազմերի հետ, նշում է EUobserver-ը։.
ԵՄ-ն նաև կխստացնի «Սբերբանկի» նկատմամբ սահմանափակումները։ Պատժամիջոցները կուղղվեն նաև «Յունարմիա» ռազմահայրենասիրական շարժմանը, արտասահմանում ռուսաց լեզվի աջակցության և տարածման «Ռուսկիյ Միր» հիմնադրամին, ինչպես նաև նավագնացության և զենքի ընկերությունների դեմ։.
Նախօրեին ԵՄ արտաքին գործերի և անվտանգության քաղաքականության գերագույն ներկայացուցիչ Ժոզեպ Բորելը հայտարարել է, որ չնայած Կրեմլի կողմից գազի մատակարարումները որպես զենք օգտագործելուն, Եվրամիությունը չի դադարեցնի Ռուսաստանի դեմ պատժամիջոցներ կիրառելը և Ուկրաինային աջակցելը։.
Ռուսաստանի դեմ ԵՄ պատժամիջոցների նախորդ՝ վեցերորդ փաթեթը հրապարակվել էր մայիսի վերջին։ Այն ներառում է ռուսական նավթի ծովային ներմուծման արգելք։.
