Ֆինլանդիայի կառավարությունը որոշել է Ռուսաստանի հետ սահմանային անցումների սահմանափակումները երկարաձգել ևս երկու ամսով՝ մինչև ապրիլի 14-ը։.
«Ռուսաստանի իշխանությունների հետ բանակցությունների միջոցով դեռևս որևէ լուծում չի գտնվել։ Ռուսական կողմը զգուշավոր է եղել սահմանապահների հետ բանակցությունների մեկնարկի և այս երևույթի կառավարման վերաբերյալ առաջարկների հարցում։ Ֆինլանդական կողմը ձգտել է զարգացնել համագործակցությունը հանցագործությունների կանխարգելման ոլորտում, սակայն դա չի հանգեցրել լուծման (խնդրի – IF)», - հայտնել է երկրի Ներքին գործերի նախարարությունը։.
Ֆինլանդիայի հանրային հեռարձակող YLE-ի փոխանցմամբ՝ Ֆինլանդիայի և Ռուսաստանի միջև ցամաքային սահմանային անցակետերը մինչև ապրիլի 14-ը փակ պահելու որոշումը կայացվել է Ֆինլանդիայի կառավարության հինգշաբթի օրվա նիստում։.
Բացի այդ, պորտալի տվյալներով, Ֆինլանդիայի և Ռուսաստանի միջև ցամաքային սահմանային անցակետերում հնարավոր չի լինի ներկայացնել միջազգային պաշտպանության դիմումներ։.
«Կան հիմքեր ենթադրելու, որ մենք գործ ունենք երկարատև իրավիճակի հետ։ Ռուսաստանի սահմանային գոտում կան առնվազն հարյուրավոր, և հնարավոր է՝ հազարավոր միգրանտներ, որոնք սպասում են իրենց ճանապարհը դեպի Ֆինլանդիա շարունակելու հնարավորությանը», - հինգշաբթի լրագրողներին ասաց Ֆինլանդիայի ներքին գործերի նախարար Մարի Ռանտանենը։.
Նրա խոսքով՝ «արևելյան սահմանի շարունակական լիակատար փակումը հասկանալիորեն ցավալի է, հատկապես Ֆինլանդիայում ապրող այն մարդկանց համար, ովքեր սահմանի մյուս կողմում ունեն ընտանիքի անդամներ կամ այլ մտերիմ ազգականներ»։ «Այնուամենայնիվ, անցակետերի ժամանակավոր փակումը Ռուսաստանի գործողությունների հետևանք է, ինչը Ֆինլանդիային ստիպում է ազգային անվտանգությունը գերադասել մյուս բոլոր մտահոգություններից», - ասել է նախարարը։.
«Այժմ, երբ մենք երկու ամսով երկարաձգում ենք սահմանների փակումը, մենք ցանկանում ենք սա օգտագործել Ռուսաստանին և երրորդ երկրների քաղաքացիներին ազդանշան ուղարկելու համար, որ Ֆինլանդիայի սահմանը բաց չէ։ Ֆինլանդիան չի հանդուրժի ճնշումը», - ասաց Ռանտանենը։.
«Հնարավոր է՝ այլ միջոցներ էլ պետք է դիտարկել», - հավելեց նա։.
Ֆինլանդիայի Ներքին գործերի նախարարությունը հայտարարել է, որ ներկայումս ուսումնասիրում է «այլընտրանքային միջոցներ»՝ համագործակցելով այլ նախարարությունների հետ։.
Նոյեմբերին Ֆինլանդիայի կառավարությունը որոշեց փակել արևելյան սահմանի բոլոր ութ ուղևորային անցակետերը՝ պատճառաբանելով Ռուսաստանի կողմից կազմակերպված երրորդ երկրներից միգրանտների զանգվածային հոսքը դեպի Ֆինլանդիայի սահման։.
Դեկտեմբերի 14-ին, ըստ որոշ տեղեկությունների, բացվել են երկու անցակետեր, սակայն նույն օրը Ֆինլանդիայի կառավարությունը դրանք կրկին փակել է մեկ ամսով «անվտանգության նկատառումներից ելնելով»։.
Հունվարի 11-ին Ֆինլանդիայի կառավարությունը ևս մեկ ամսով երկարաձգեց Ռուսաստանի հետ սահմանը հատելու սահմանափակումները։.
