Իտալիայի կառավարող կոալիցիայի երեք կուսակցություններ հրաժարվել են մասնակցել վարչապետ Մարիո Դրագիի վստահության քվեարկությանը։ BBC-ի հաղորդմամբ՝ այժմ սպասվում է, որ նա կրկին հրաժարական կտա՝ չնայած քվեարկության դրական արդյունքին։.
Դրագին հաղթեց քվեարկության արդյունքում, սակայն, չունենալով երեք կուսակցությունների աջակցությունը, այժմ, հավանաբար, երկրորդ անգամ հրաժարական կտա։ Այնուամենայնիվ, սպասվում է, որ նա կմասնակցի հուլիսի 21-ին խորհրդարանի ստորին պալատում կայանալիք քննարկմանը։.
Սենատում տեղի ունեցած բուռն քննարկման ընթացքում պարզ դարձավ, որ ծայրահեղ աջակողմյան «Լիգա» կուսակցությունը և կենտրոնամետ «Առաջ, Իտալիա» կուսակցությունը պատրաստ չէին մնալ կառավարությունում ճգնաժամը հրահրած «Հինգ աստղ» պոպուլիստական շարժման հետ։ Երեքն էլ դուրս եկան քվեարկությունից։.
«Հինգ աստղ» շարժման նախկին առաջնորդ Լուիջի Դի Մայոն սա անվանեց Իտալիայի համար «սև էջ»։ Տարածաշրջանային հարցերով նախարար Մարիաստելլա Ջելմինին հայտարարեց «Ֆորցա Իտալիա»-ից դուրս գալու մասին՝ մեղադրելով կուսակցությանը իտալացիներին մեջք շրջելու և ծայրահեղ աջերին զիջելու մեջ։ Կենտրոնամետ Դեմոկրատական կուսակցությունը հայտարարեց, որ կպատրաստվի ընտրարշավին։.
Հուլիսի 14-ին Դրագին հայտարարեց, որ հրաժարականի դիմում է ներկայացրել Հանրապետության նախագահին։ Սակայն նախագահ Սերջիո Մատարելան չընդունեց նրա հրաժարականը։ Դրագիի կառավարության ապագան հարցականի տակ դրվեց, երբ նրա կոալիցիոն գործընկեր «Հինգ աստղ» շարժումը հրաժարվեց վստահության քվեարկությունից։.
Այսօր Դրագին, ոգևորված հանրային աջակցությամբ, հրաժարվեց իր հրաժարականից՝ կոչ անելով նոր կոալիցիոն համաձայնագիր կնքել՝ ազգային միասնության կառավարությունը փլուզումից փրկելու համար։.
