Վլադիմիր Պուտինը ճանաչեց Դոնեցկի Ժողովրդական Հանրապետության (ԴԺՀ) և Լուգանսկի Ժողովրդական Հանրապետության (ԼԺՀ) ինքնահռչակ հանրապետությունները, որոնք ձևավորվել են 2014 թվականին Ուկրաինայի Դոնբասի՝ ռուսամետ անջատողականների կողմից վերահսկվող տարածքներում: Ռուսաստանի նախագահն այս հայտարարությունն արեց ռուս ժողովրդին ուղղված արտակարգ հեռուստատեսային ուղերձում:.
Դոնեցկի և Լուգանսկի հանրապետությունները ճանաչելու որոշումը կայացվել է Ռուսաստանի Անվտանգության խորհրդի նիստից հետո, որի մասնակիցները աջակցություն են հայտնել Պետդումայի նախաձեռնությանը։.
Վլադիմիր Պուտին, Ռուսաստանի նախագահ. «Նախագահներն ու Ռադայի անդամները կարող են փոխվել, բայց էությունը մնում է՝ Կիևում իշխանությունը զավթած ռեժիմի ագրեսիվ, ազգայնական բնույթը։ Այն ամբողջությամբ 2014 թվականի հեղաշրջման արդյունք է։ Նրանք, ովքեր ընտրել են բռնության, արյունահեղության և անօրինականության ուղին, չեն ճանաչել և չեն ճանաչի Դոնբասի հարցի որևէ լուծում, բացի ռազմականից։ Այս առումով ես անհրաժեշտ եմ համարում կայացնել վաղուց սպասված որոշում՝ անհապաղ ճանաչել Դոնեցկի Ժողովրդական Հանրապետության և Լուգանսկի Ժողովրդական Հանրապետության անկախությունն ու ինքնիշխանությունը։ Ես խնդրում եմ Ռուսաստանի Դաշնության Դաշնային ժողովին աջակցել այս որոշմանը, ապա վավերացնել երկու հանրապետությունների հետ բարեկամության և փոխօգնության պայմանագրերը»։.
Փետրվարի 15-ին Պետդուման մեծամասնությամբ աջակցեց մի բանաձևի, որի համաձայն՝ Ռուսաստանի Դաշնության Կոմունիստական կուսակցության խմբակցության կողմից առաջարկված՝ Դոնեցկի և Լուգանսկի ժողովրդական հանրապետությունների ճանաչման վերաբերյալ Պուտինին ուղղված դիմումի նախագիծը ուղարկվեց նախագահին։.
Ուկրաինայի անջատողական շրջանների ճանաչումը որպես անկախ պետություններ լայնածավալ վրդովմունք առաջացրեց Արևմուտքում, որտեղ Ռուսաստանի քայլը որակվեց որպես միջազգային իրավունքի և Մինսկի համաձայնագրերի խախտում։.
