Չինաստանի մաքսային գլխավոր վարչությունը Վլադիվոստոկը հայտարարել է ներքին առևտրի տարանցիկ նավահանգիստ, հաղորդում է VPost-ը՝ հղում անելով Վլադիվոստոկում Ռուսաստանի արտաքին գործերի նախարարության ներկայացուցչության հայտարարությանը։.
Այսուհետ Չինաստանի մեկ նահանգից մյուսը տեղափոխվող բեռները Վլադիվոստոկով կանցնեն առանց մաքսային ընթացակարգերի։.
Որոշումն ուժի մեջ է մտնում հունիսի 1-ից և կազդի Չինաստանի հյուսիս-արևելքից հարավ տեղափոխվող ապրանքների վրա: Նախկինում Ռուսաստանին սահմանակից Ցզիլին նահանգից բեռները սովորաբար տեղափոխվում էին Չինաստանի հակառակ ծայր՝ անցնելով 1000 կիլոմետր դեպի Դեղին ծովի նավահանգիստներ: Այժմ դրանք կտեղափոխվեն ընդամենը մի քանի հարյուր կիլոմետր դեպի Վլադիվոստոկ: Այնտեղ կոնտեյներները կվերաբեռնվեն նավերի վրա և կուղարկվեն ստացողին:.
Չինաստանի համար հյուսիս-արևելք-հարավ լոգիստիկ երթուղու ցամաքային հատվածը հնգապատիկ կրճատելու հնարավորությունը չափազանց կարևոր է. երկիրը հաստատել է Հյուսիս-արևելյան Չինաստանի արդյունաբերությունը վերակենդանացնելու ռազմավարական ծրագիր, որը նախատեսում է արտադրության արագ աճ: Այնուամենայնիվ, VPost-ի տրանսպորտային ոլորտի աղբյուրների փոխանցմամբ՝ դեռևս պարզ չէ, թե արդյոք Վլադիվոստոկի ենթակառուցվածքները կկարողանան հաղթահարել բեռնափոխադրումների զգալի աճը:.
Անցյալ տարվա սեպտեմբերից մինչև դեկտեմբեր ընկած ժամանակահատվածում Վլադիվոստոկի նավահանգստում խցանումներ էին առաջացել, որոնց պատճառով նավերը ստիպված էին մինչև երկու շաբաթ սպասել բեռը բեռնաթափելու համար: Աղբյուրները հրատարակությանը հայտնել են, որ խցանումները կարող են կրկին առաջանալ մինչև աշուն:.
